नेपाःगाःया नेवाः संस्कृतिइ संगीत {Newar culture and music in Nepāgā}

Abstract

Listen

Translate article

नेपाःगाःया नेवाःत संस्कृति हनेगुली तसकं न्ह्यःने लाः । जीवनया प्रारम्भिक ईनिसें अन्त मजूतले, दछियंक लकसयात ल्वय्क नखःचखः, मेलापर्व, जात्रा हनेगु यानाच्वंगु दु । थुज्वःगु संस्कृति अर्थ, भूगोल, स्वास्थ, मौसम, सुचुपिचु, ऐतिहासिक, राजनैतिक घटना, पर्यावरणनाप स्वापू तयाः जीवनयात न्ह्याइपुक न्ह्यनेयंकेगु तातुना थाय् विशेष फरक फरक संस्कृति न्ह्याकाच्वंगु दु । संस्कृति दुने धर्मदर्शन नापं मनोरञ्जन दुथ्याकाः जीवन वंगु हे मचाय्क सामाजिक सद्भाव व सामाजिक एकतायात स्वानाः न्ह्यांवनाच्वंगु दु । थुज्वःगु संस्कृतिइ संगीत गुकथं ? गुगु थासय् ? दुथ्यानाच्वंगु दु धैगु न्ह्यसःया लिसःकथं गुज्वःगु संस्कृतिइ बाजा म्ये, प्याखं संगीत छ्यलातःगु दु धकाः क्यनेगु थुगु च्वसुया तातुना खः । थुकी नेपाःगाःया नेवाः संस्कृतिइ संगीतया स्वापूयात जक न्ह्यब्वयागु दु । थुकिया लागि पुस्तकालय सामग्रीयात छ्यलाः नेवाः संस्कृतिइ संगीतया छ्यलायात ब्याख्या विश्लेषण गुणात्मकता विधिकथं यानागु दु । नेवाःतय्सं न्ह्याकाच्वंगु जात्रापर्व, मेला नखःचखः, संस्कार थें जाःगु संस्कृतिइ प्रदर्शनकारी कला म्ये, बाजा, प्याखं गुकथं स्वानाच्वंगु दु । जात्राय् मेलाय् नखचखः, संस्कार आदिइ संगीतया छ्यला, भूमिका व स्वापूया बारे विश्लेषण जूगु दु । मूर्त रुपं खनेदैगु, प्रदर्शन जुइगु संस्कृतिया मेरुदण्डया रुपय् अमूर्त ज्ञान (सीप कला) दर्शनपाखें निर्देशित जुयाच्वनी, पिनेया गुलि नं अभ्यासगत संस्कृति सिद्धान्तया आधारय् न्ह्यानाच्वनी । थुगु खँ थुकी न्ह्यब्वयागु दु । थुगु च्वसु संस्कृति व संगीतया अनुसन्धान याइपिनिगु लागि उपयुक्त जुइ ।