Поврзаност на полиморфизмите rs20325282 во генот ABCB1 и RS1695(A313G) во генот GSTP1 со токсичните ефекти при хемотерапија на карцином на дојка со циклофосфамид и доксорубицин

Abstract

Карциномот на дојката е меѓу водечките причини за морбидитет и морталитет и е меѓу најчестите малигни неоплазми кај женскиот пол во светски рамки. Адјувантната хемотерапија со комбинација на циклофосфамид и доксорубицин често е проследена со низа токсични ефекти со различен степен на изразеност и клиничка значајност за што клучна улога имаат конститутивните полиморфизми во гените вклучени во детоксификацијата и метаболизмот на хемотерапевтиците. Основната цел на студијата беше да се определи генетската поврзаност на полиморфизмите rs20325282 во генот ABCB1 и rs1695 во генот GSTP1 со појавата на токсични ефекти во текот на хемотерапијата со циклофосфамид и доксорубицин кај пациентките со карцином на дојка. Материјал и методи: определувањето на двата полиморфизма се изврши врз DNA примероците изолирани од 110 случаи со карцином на дојка кои биле третирани адјувантно со циклофосфамид и доксорубицин, по претходно добиена согласност од пациентките. Статистичките анализи беа извршени споредувајќи ги клиничките податоци за токсичните ефекти со фреквенциите на генотиповите и алелите од испитуваните генски полиморфизми. Резултати: анализите покажаа дека полиморфизмите rs1695 во генот GSTP1 и rs20325282 во генот ABCB1 имаат предиктивна вредност во проценката на веројатноста, односно ризикот од појава на неутропенија, леукопенија и на кој било токсичен ефект, со исклучок на гадење и повраќање. Покрај тоа, полиморфизмот rs1695 во генот GSTP1 има предиктивна вредност при идентификација на ризикот од појава на анемија. Заклучок: во иднина овие сознанија можат да се користат за прилагодување и персонализирање на хемотерапијата според индивидуалната генотипска комбинација кај секој поединечен пациент.